លោក សុខ ប៊ុន ជាប់ទោស ៣ ឆ្នាំតែអនុវត្តត្រឹម ១០ ខែ
16-February-2016 | ដោយ មែន កំសត់
ភ្នំពេញៈ ចៅក្រមសាលាដំបូងរាជធានីភ្នំពេញកាលពីម្សិលមិញបានប្រកាសសាលក្រមឲ្យ លោក សុខ ប៊ុន ជាប់ពន្ធនាគារ ៣ ឆ្នាំតែត្រូវអនុវត្តទោសតែ ១០ ខែប៉ុណ្ណោះ និងបង់ប្រាក់ ៦ លានរៀលចូលថវិការដ្ឋក្រោមបទចោទ «ហិង្សាដោយចេតនាមានស្ថានទម្ងន់ទោស» ប៉ុន្តែមិនមានវត្តមានជនជាប់ចោទ សុខ ប៊ុន និងភាគីដើមបណ្តឹង កញ្ញា ឯក សុខជាតា ហៅសាសា ទេ។
លោកស្រីចៅក្រម ស៊ លីណា បានថ្លែងពេលប្រកាសនោះថា៖ «សាលក្រមនេះសម្រេចឡើងតាមមាត្រា ២១៨ កថាខណ្ឌ ២ និងកថាខណ្ឌ ៣ និងមាត្រា ១០៦,១០៧, ១០៨ នៃក្រមព្រហ្មទណ្ឌ និងបានបើកផ្លូវប្តឹងឧទ្ធរណ៍តាមកំណត់នៃច្បាប់»។ ប៉ុន្តែលោកស្រីមិនបានបញ្ជាក់ពីមូលហេតុដែលលោក សុខ ប៊ុន ត្រូវអនុវត្តទោសតែ ១០ ខែនោះទេ។
លោក អ៊ុត ធី ឪពុករបស់ដើមបណ្តឹងគឺកញ្ញា សាសា បានឲ្យដឹងថាលោកមិនមានការភ្ញាក់ផ្អើលអ្វីទេដោយសារលោកគិតថា ជនជាប់ចោទ សុខ ប៊ុន ស្ទើរតែមិនដែលស្ថិតនៅក្នុងពន្ធនាគារឡើយតាំងពីត្រូវបានចាប់ខ្លួន មក។
លោកថា៖ «ប្អូនឯងដឹងថា សុខ ប៊ុន នៅឯណាទេ? ម្តងថានៅពេទ្យរុស្ស៊ីម្តងថានៅពេទ្យកាល់ម៉ែត»។
ប៉ុន្តែលោកថាយ៉ាងហោចណាស់លោក សុខ ប៊ុន បានស្គាល់សំណាញ់ច្បាប់ និងបានស្គាល់រសជាតិរស់នៅក្នុងពន្ធនាគារដែរ៖ «ទោះបីគាត់ជាប់ ១០ ថ្ងៃក្នុងគុកក៏គាត់ស្គាល់រសជាតិដែរ។ គាត់ជាឧកញ៉ាជាប់ពន្ធនាគារបរទេសគេបានដឹងថាស្រុកយើងមានច្បាប់។ ការសម្រេចរបស់តុលាការខ្ញុំមិនអាចប្រឆាំងបានទេ»។
លោក ពុធ ធាវី មេធាវីការពារកញ្ញា សាសា បានឲ្យដឹងថាការសម្រេចរបស់តុលាការនេះសមរម្យទៅនឹងការប្រព្រឹត្ត របស់លោក សុខ ប៊ុន ៖ «ជាប់បីឆ្នាំអនុវត្ត ១០ ខែសល់ប៉ុន្មានព្យួរវាច្រើនដែរ ៣ ឆ្នាំ»។
លោកបន្ថែមថានឹងមិនប្ដឹងបន្តរឿងក្តីនេះទៅឧទ្ធរណ៍ទេដោយសារកូនក្តីលោកមិនឲ្យប្តឹង។
ចំណែកលោក សេង សុវីណា មេធាវីការពារលោក សុខ ប៊ុន បានថ្លែងថារឿងនេះកូនក្ដីលោកក៏មិនប្តឹងឧទ្ធរណ៍ដែរ។ បើតាមលោកមេធាវីលោក សុខ ប៊ុន នឹងត្រូវនៅក្នុងពន្ធនាគារមិនដល់បីខែទៀតទេ។
ចំពោះសំណងក្រៅប្រព័ន្ធតុលាការរវាងកញ្ញា សាសា និងលោក សុខ ប៊ុន ត្រូវបានលោក អ៊ុត ធី ប៉ាន់ស្មានថាប្រហែលជាមានទឹកប្រាក់ ១០ ម៉ឺនដុល្លាគឺដើម្បីធ្វើដំណើរ និងចេញថ្លៃព្យាបាលនៅបរទេស។
លោកបានបញ្ជាក់ថា៖ «ខ្ញុំបានប្រាប់សាមីខ្លួនគេថាមុននឹងក្រោយគេនឹងឲ្យនៅក្រៅឃុំ ដដែលព្រោះគេជាប់កន្លះឆ្នាំហើយ។ ដូច្នេះឲ្យសាមីខ្លួនគេជួបគ្នានិយាយគ្នាទៅទារប៉ុន្មានស្រេចតែ សាមីខ្លួនគេទៅ។ តាមខ្ញុំដឹងគឺស្មើតម្លៃព្យាបាលប្រហែល ១០ ម៉ឺនដុល្លា»។ ប្រភពដែលស្និទ្ធនឹងកញ្ញា សាសា ម្នាក់ទៀតបានឲ្យដឹងដែរថាសំណងក្រៅតុលាការគឺពិតជាមានទឹកប្រាក់ ១០ ម៉ឺនដុល្លារមែន។
ទោះបីសំណុំរឿងព្រហ្មទណ្ឌរវាងកញ្ញា សាសា និងលោក សុខ ប៊ុន បានដល់ទីបញ្ចប់ហើយក្តីអ្នកពាក់ព័ន្ធម្នាក់ទៀតគឺអង្គរក្សរបស់ លោក សុខ ប៊ុន មិនទាន់ត្រូវបានចាប់ខ្លួនមកជំនុំជម្រះនៅឡើយទេ។ អង្គរក្សរូបនេះត្រូវបានចោទពីបទ«ប៉ុនប៉ងមនុស្សឃាត និងប្រើប្រាស់អាវុធដោយគ្មានការអនុញ្ញាត»។
លោក សុខ ខេមរិន្ទ ប្រធាននាយកដ្ឋាននគរបាលព្រហ្មទណ្ឌក្រសួងមហាផ្ទៃបានបញ្ចាក់ថា លោកកំពុងរង់ចាំដីកាពីតុលាការដើម្បីតាមចាប់ខ្លួនជននេះ។
លោកថា៖ «សំណុំរឿងនេះបានប្រគល់ជូនចៅក្រមអស់ហើយដូច្នេះចៅក្រមជាអ្នក សម្រេច។ បើសិនជាករណីភ្លាមៗយើងអាចចាប់បាន»។ លោកក៏បានបញ្ជាក់ដែរថាលោកមិនទាន់ដឹងពីអត្តសញ្ញាណអង្គរក្សរបស់ លោក សុខ ប៊ុន នៅឡើយនោះទេ។
ចៅក្រមលោកស្រី ស៊ លីណា មិនអាចទាក់ទងសុំការបំភ្លឺបានទេកាលពីម្សិលមិញ៕
ចំនួនអ្នកទស្សនា
- ថ្ងៃនេះ2801
- ម្សិលមិញ2931
- សប្តាហ៍នេះ14991
- ខែនេះ2801
- ឆ្នាំនេះ986021
- សរុប20213467